Kusini Kwetu

Na Mwandishi Wetu

Jeshi la Polisi Mkoa wa Mbeya kwa kushirikiana na Taasisi ya Kudhibiti Ubora wa Mbegu Tanzania (TOSCI), limefanikiwa kukamata zaidi ya tani 2.9 za mbegu zinazodaiwa kuwa bandia, katika operesheni iliyofanyika jijini Mbeya.

Akizungumza jana katika Mtaa wa Ituha, jijini Mbeya, Kamanda wa Polisi Mkoa wa Mbeya, Kamishna Msaidizi Mwandamizi wa Polisi (SACP) Benjamin, amesema jeshi hilo lilifanikiwa kubaini nyumba iliyokuwa ikitumika kama kiwanda cha kutengeneza na kufungasha mbegu bandia.

Amesema katika operesheni hiyo, watuhumiwa walikamatwa pamoja na mbegu hizo na vifaa mbalimbali vilivyokuwa vikitumika katika shughuli hiyo haramu.

Miongoni mwa vitu vilivyokamatwa ni zaidi ya tani 2.9 za mbegu bandia za aina mbalimbali, mifuko tupu 230 ya sandarusi yenye nembo ya kampuni ya Seed Co, mifuko mingine 90 isiyo na alama, mizani mitano ya kidijitali, mashine saba za kushonea mifuko aina ya Bravoo pamoja na rola moja ya nyuzi.

Vifaa vingine ni mashine tano za kufungia mifuko ya plastiki, maboksi manane yenye dawa mbalimbali, madumu matatu yenye sumu aina ya Bamidacy, mfuko mmoja wa dawa ya kuhifadhia nafaka aina ya Seed Care na galoni moja la lita tano lenye dawa.

Pia, Polisi wamekamata rola moja ya stika za mbegu za ruzuku, rola moja ya stika za Deka LB, stika mbalimbali za OECD pamoja na mifuko 44 ya dawa aina ya Sabcop-50.

Kwa mujibu wa Kamanda Kuzaga, Jeshi la Polisi Mkoa wa Mbeya linaendelea na msako mkali wa kumtafuta mtuhumiwa pamoja na kubaini mtandao mzima unaojihusisha na utengenezaji na usambazaji wa mbegu bandia kwa kutumia nembo na chapa zinazofanana na zile za kampuni za Serikali na binafsi.

Athari za Mbegu Bandia kwa Wakulima na Uchumi

Uuzaji na usambazaji wa mbegu bandia una madhara makubwa kwa wakulima na sekta ya kilimo kwa ujumla. Mbegu hizo zinaweza kushindwa kuota, kuchelewa kukomaa au kutoa mazao yenye ubora na kiwango cha mavuno kisichotarajiwa.

Hali hiyo inaweza kusababisha wakulima kupata hasara ya fedha na muda, kupoteza msimu wa kilimo na hata kuingia katika madeni kutokana na gharama za maandalizi ya mashamba, mbolea, viuatilifu na nguvu kazi.

Aidha, matumizi ya mbegu zisizo na ubora yanaweza kuhatarisha usalama wa chakula, kupunguza uzalishaji wa mazao nchini na kudhoofisha uchumi wa wakulima pamoja na taifa kwa ujumla.

Kutokana na hali hiyo, hatua za Jeshi la Polisi na TOSCI zinatajwa kuwa muhimu katika kulinda wakulima dhidi ya udanganyifu, kuhakikisha ubora wa pembejeo za kilimo na kudhibiti vitendo vinavyoweza kuhatarisha uzalishaji wa chakula nchini.

Wakulima wanashauriwa kununua mbegu katika maduka na kwa wauzaji wanaotambulika, kuhakiki lebo na taarifa za bidhaa pamoja na kutoa taarifa kwa mamlaka husika wanapobaini dalili za kuwepo kwa mbegu bandia sokoni.